महाकाली नदीमा तार तान्ने क्रममा सशस्त्र प्रहरीका असई बेपत्ता

महेन्द्रनगर । महाकाली नदीमा नेपाल टेलिकमको तार तान्ने क्रममा सशस्त्र प्रहरी बलको देवीस्थान गुल्म, दोधारामा कार्यरत सहायक प्रहरी निरीक्षक सागरराज थारु बेपत्ता भएका छन् ।

बर्दिया निवासी थारु तार तान्ने क्रममा प्रयोग गरिएको र्‍याफ्टिङ बोट अनियन्त्रित भएपछि नदीमा बेपत्ता भएको बताइएको छ ।

केही दिनअघि महाकाली नदीमाथि रहेको दोधारा चाँदनी झोलुङ्गे पुल भत्किएको क्षेत्रमै तार तान्ने क्रममा उक्त घटना भएको हो ।

घटनापछि बेपत्ता थारुको खोजी कार्य भइरहेको जनाइएको छ । घटनाबारे थप विवरण आउन बाँकी छ ।