कञ्चनपुरमा १६ लाख ८७ हजार रुपैयाँ बराबरको अवैध पटाका बरामद

महेन्द्रनगर । कञ्चनपुरमा प्रहरीले १६ लाख ८७ हजार रुपैयाँ बराबरको विभिन्न प्रकारका अवैध पटाका बरामद गरेको छ ।

जिल्ला प्रहरी कार्यालय कञ्चनपुरबाट प्रहरी निरीक्षक विक्रमबहादुर शाहीको कमाण्डमा खटिएको प्रहरी टोलीले विशेष सूचनाका आधारमा बुधबार बेदकोट नगरपालिका–७ गाउजीमा लुकाइछिपाइ राखिएको अवस्थामा उक्त पटाका बरामद गरेको हो ।

प्रहरीका अनुसार बरामद गरिएका विभिन्न प्रकारका पटाकाको अनुमानित मूल्य रु. १६ लाख ८७ हजार रहेको छ । उक्त पटाका आवश्यक अनुसन्धान तथा कारबाहीका लागि जिल्ला प्रहरी कार्यालय कञ्चनपुरमा ल्याइएको छ।

घटनाबारे थप अनुसन्धान भइरहेको जिल्ला प्रहरी कार्यालय कञ्चनपुरका प्रवक्ता एवं प्रहरी नायव उपरीक्षक टेकबहादुर रावतले जानकारी दिए ।